Il ultims onns han differents studis scientifics confermà che la natira ha in effect positiv sin nossa sanadad mentala e corporala. En spezial la forza curativa dal guaud sa lascha implementar fitg bain per promover la sanadad en la prevenziun e la terapia. In studi actual da la Bern AG e la ZHAW sa fatschenta cun guauds da sanadad e lur potenzial per il turissem. En il Giapun enconusch'ins gia pli ditg l'uschenumnà bogn da guaud (Shinrin Yoku) u la regeneraziun en il guaud e l'effect sanadaivel positiv è cumprovà e renconuschì scientificamain.
La terapia da guaud nizzegia a moda terapeutica e preventiva las atmosferas multifaras dal guaud e sias structuras guaud per stimular corp, olma e spiert. Interacziuns conscientas ed intenziunadas tranter il guaud e l'uman promovan las forzas d'autoguariziun e sustegnan l'occupaziun cun sasez, l'agen corp, la vita ed il senn da la vita ed il guaud sco spazi natiral e vital.
Cun sia cuntrada natirala originala e ses clima sanadaivel ha il Grischun in potenzial extraordinari da nizzegiar sias resursas natiralas per il turissem da sanadad.
A la tschertga da projects e purschidas
Nus tschertgain purschidas en il champ dal turissem da sanadad sin basa da la natira. As annunziai tar nus, sche Vus avais gia ina purschida correspundenta u sche Vus tschertgais inputs u partenaris per la realisaziun.
Las suandantas cundiziuns duessan esser ademplidas:
- purschida da sanadad fundada en la natira, concepida per giasts en il Grischun
- collavuraziun da furnitur:as da prestaziuns dal turissem e da la sanadad ed ev. da l'economia da guaud u l'economia forestala
- scolaziun renconuschida en il champ dal turissem da sanadad basà sin la natira, bogn da guaud, terapia da guaud etc.
- creaziun da valur en il Grischun
- Vossa purschida contribuescha al rinforzament da la posiziun dal Grischun sco emprima adressa per il turissem da sanadad resp. vacanzas da sanadad en Svizra