Survista da tut ils temas

La pagina-web infurmescha davart il tema vacanzas da sanadad en il chantun Grischun ed illustrescha la purschida vasta da terapias, tractaments, recreaziun e trenament.

Il ultims onns han differents studis scientifics confermà che la natira ha in effect positiv sin nossa sanadad mentala e corporala.

Ina buna sanadad mentala è decisiva per noss bainesser cumplessiv. Il Grischun posseda las premissas idealas per purschidas turisticas en quest champ.

Hotels da wellness medicinal porschan servetschs multifars che cumpiglian il nutriment, la prevenziun da stress, sport e moviment sco era la terapia da dolurs u la cosmetica medicinala. Cuntrari a la medischina da sport sa concentrescha il wellness medicinal pli fitg sin dumondas dal nutriment, dal stress e da la cosmetica che sin l'augment da prestaziun.

Per adina dapli persunas èn prestaziuns ed activitads sportivas impurtantas. La dumonda per purschidas da vacanzas e dal temp liber adattadas crescha. Il Grischun porscha – pervia da sia natira unica en cumbinaziun cun las spezialistas ed ils spezialists al lieu – las premissas idealas per purschidas da la medischina da sport.

En Svizra pateschan numerus umans da malsognas cronicas ed il dumber da las persunas pertutgadas crescha vinavant. Las purschidas da vacanzas per questas gruppas en mira ston satisfar a basegns spezials, perquai che las pretensiuns da las pazientas e dals pazients areguard il sustegn medicinal e/u da tgira/terapeutic durant il segiurn sa differenzieschan fermamain.