Tschertgà: partenaris regiunals ed interregiunals

Davos Sports & Health

Stadi dal project: Per amplifitgar e per commerzialisar cuminaivlamain «Davos Sports & Health» vegnan tschertgads partenaris da project.

Sut il num «Davos Sports & Health» duai il Swiss Olympic Medical Center (SOMC) daventar il center regiunal il pli impurtant da muntada (inter-)naziunala. I vegn prendì en mira ina collavuraziun regiunala e surregiunala cun ulteriurs partenaris. Quels pon derivar dal sectur da l’hotellaria, dal management d’events u da la perscrutaziun. Quai po però er esser interpresas u federaziuns da sport che tegnan quint da la sanadad. Ils avantatgs d’ina collavuraziun è la pussaivladad d’entrar en contact cun ils partenaris da project e da sviluppar purschidas attractivas ed interdisciplinaras.

Avais Vus interess da collavurar? Contactai la persuna da contact u il post da coordinaziun dal turissem da sanadad. Ulteriuras infurmaziuns chattais Vus sin la pagina d’internet da «Davos Sport & Health».

La finamira dal project è da render pli visibla la purschida «Davos Sports & Health» e da generar dapli reservaziuns.

«Davos Sports & Health» tgira en moda cumpetenta e nuncumplitgada sportistas e sportists che apprezieschan il contact persunal cun las spezialistas ed ils spezialists, che han basegns d’ina infrastructura d’emprima qualitad e che vulan profitar d’ina assistenza cumplessiva per la diagnostica da lur prestaziun e d’in tractament medicinal.
«Davos Sports & Health» promova la sanadad dals osps e da las persunas indigenas che vulan profitar d’ina assistenza medicinala individuala che metta la sanadad en il center, e quai entamez la natira e la cuntrada alpina magnifica.
Tras la perscrutaziun e la furmaziun stgaffescha «Davos Sports & Health» savida en la domena da la medischina da sport e da sanadad e realisescha projects en collavuraziun cun partenaris.

Center sportiv tradiziunal

Cun sias cundiziuns climaticas, l'autezza, l'infrastructura d'emprima qualitad e la purschida da sport multifara porscha Tavau las premissas optimalas per atletas ed atlets da numerus geners da sport. Grazia a questas premissas idealas, in'infrastructura extraordinaria moderna e l'experientscha da blers onns en la medischina da sport tutga Tavau tar ils lieus principals da Swiss Olympic. Bleras sportistas e blers sportists d'elita ed uniuns da sport absolvan lur trenament en l'autezza en la citad situada il pli aut en l'Europa e profiteschan da las cundiziuns da trenament optimalas e dals indrizs da sport excellents.

Tgira medicinala sin il pli aut nivel

Cun «Davos Sports & Health» profiteschan sportistas e sportists d'elita sco era sportistas e sportists per hobi e dal temp liber d'ina tgira medicinala cumplessiva sin il pli aut nivel. Cun analisas da la situaziun sin basa da checks da la medischina da sport e la diagnostica da prestaziun, in coaching cun recumandaziuns individualas e plans da trenament fin ad in nutriment perfetg e massaschas suenter il trenament èn las atletas ed ils atlets en buns mauns tar las expertas ed ils experts da «Davos Sports & Health».

Center da grondas prestaziuns en collavuraziun cun il HCD e Swiss Ski

Cun la finamira da daventar il center da la medischina da sport principal per sportistas e sportists d'elita ed atletas ed atlets giuvens en la regiun e d'impurtanza (inter)naziunala sviluppa «Davos Sports & Health» actualmain en stretga collavuraziun cun il Club da Hockey da Tavau in center da prestaziuns modern en las localitads dal stadion da glatsch a Tavau. Il center duai satisfar als basegns medicinals dal sport d'elita en l'ambient famigliar da Tavau. En quel connex cooperesch'ins gia dapi in temp pli lung stretgamain cun Swiss Ski en il center da prestaziuns naziunal, cun il gimnasi da sport e cun la classa da talents da Tavau. Plinavant èsi planisà da collavurar pli intensivamain cun uniuns localas e corporaziuns regiunalas.

Novas purschidas turisticas

La medischina da sport na duai però betg esser resalvada al sport d'elita. Uschia stattan a disposiziun e vegnan sviluppadas vinavant specificamain en il rom dal nov concept turistic («Sports Unlimited») las medemas purschidas era per sportistas e sportists ambiziunads per hobi e dal temp liber. In exempel èn las emnas da trenament individualisadas cun checkups per sportistas e sportists d'elita e per hobi, ma era per giasts che s'orienteschan ad ina moda da viver sanadaivla da tut las classas da vegliadetgna – en cooperaziun cun Tavau Turissem, hotels tschernids ed ils medis da Tavau.